“Unha das mochilas estaba en Barcelona, leva alí varias semanas”, sinalan estas mesmas fontes. As outras tres, dedicadas á cobertura deportiva. Dos cinco reporteiros gráficos en quenda de traballo, catro estaban tamén cubrindo eventos deportivos: o Coruxo, o Compostela e o Ribadumia de fútbol e mais baloncesto en Ourense. A directora de informativos Concha Pombo, “que no novo organigrama ten todo o poder”, non chegou á sede do ente público “até as once menos dez da noite”.
Sobre esa hora, máis ou menos, a grella da TVG foi modificada. Detívose a emisión da serie Serramoura. Un dos seus protagonistas, o actor Miguel Ángel Blanco, chegara mesmo a esixir que se cortase na súa conta da rede social twitter -en que ten máis de 3.300 seguidores: “Penso que deberían cortar a emisión xa e informar do que está pasando”. Nesa altura, xa se sabía da morte de dúas persoas atrapadas polo lume nunha furgoneta en Nigrán.
“Houbo xente que non estaba en quenda de traballo e que se ofreceu. Os responsábeis dixeron que non era necesario. O 1 de outubro [data do referendo de autodeterminación de Catalunya] si chamaron traballadores fóra de quenda para que axudasen”, indican no comité de empresa, “ben se ve cales son as prioridades da dirección desta casa”. Representantes sindicais insisten en que o cadro de persoal “non ten a culpa”. “Somos despois os traballadores os que damos a cara nos coches rotulados. Xa pasou que se puxese en risco a nosa integridade física”, denuncian.
O programa especial sobre os incendios comezou, finalmente, perto das once da noite e estendeuse até as tres da mañá. Máis dun cento de focos activos, case unha vintena a pór en risco serio núcleos de poboación, e a televisión pública “non tiña organizada unha programación especial, nin informaba á poboación do que tiña que facer nunha situación de emerxencia. Os medios públicos non cumpriron a súa función”.
Artigo publicado en Sermos Galiza (16/10/2017)
