A recente polémica sobre a manifesta parcialidade da Policia Local da Coruña na aplicación da Ordenanza Municipal de Residuos e Limpeza Viaria, procedendo a eliminar prontamente pintadas críticas con actuacións da Alcaldía e deixando sen limpar o resto, é bon momento para lembrar que desde hai anos axentes deste corpo policial veñen aplicando esta norma de xeito enviesado, quer sexa para criminalizar a pobreza, quer para sancionar a expresión de opinións politicas.
Por procurar no lixo
No ano 2015 EsCULcA rexistrou queixa na oficina do Valedor do Pobo e escrito no Concello da Coruña sobre a actuación da Policía Local desta cidade contra as persoas que recollen comida e outros obxectos nos colectores do lixo, ás que se abría expediente sancionador ao abrigo da Ordenanza Municipal de Residuos e Limpeza Viaria (art. 112.3 c), unha medida que EsCULcA entendía criminalizaba a pobreza e sospeitaba era aplicada pola Policía Local con viés xenófobo. Ao concello pedíase tamén a derrogación da norma.
Por pintar nun muro sen valor patrimonial
En decembro dese mesmo ano, 2015, a concelleira delegada de Medio Ambiente do Concello da Coruña, María García, que actuaba “por delegación da Xunta de Goberno Local”, notificou a 4 mozos que pintaran un mural en apoio do pobo palestino nunha parede da cidade sen valor patrimonial algún a abertura de expediente sancionador por “presunta infracción do artigo 74 da Ordenanza Municipal de Xestión de Residuos Municipais e Limpeza Viaria deste Concello”.
Por colar unha faixa de papel nunha parede ateigada de propaganda
Dous anos máis tarde, en 2017, foi a vez de dous membros do C.S. Gomes Gaioso. Retidos por axentes da Polícia Local por colarem umha faixa de papel em apoio à independência de Catalunya nunha parede da Rúa da Torre utilizada por colectivos e entidades públicas e privadas precisamente para este tipo de propaganda, foron despois sancionados con multas de 400€ cada un por incumprimento da normativa “medioambiental”