Está a piques de saír do prelo Os nomes do terror. Galiza 1936: os verdugos que nunca existiron, o primeiro achegamento sistemático ao estudo dos represores na Galiza que racha con este tabú nos traballos da memoria histórica e pon en negro sobre branco os nomes, as causas e as metodoloxías usadas polo terror.
Este traballo, que publica Sermos Galiza e estará nas librarías a partir do Día da Patria Galega, 25 de xullo, está coordinado polos historiadores Xosé Ramón Ermida, Dionisio Pereira, Eliseo Fernández e Xoán Carlos Garrido. E nel participan moitos dos principais investigadores desta época na Galiza, como Emilio Grandío, Carlos Nuevo Cal, Bernardo Máiz, Xosé Álvarez, Manuel Pazos, Judith Carbajo, Ana Cebreiros, Carlos F. Velasco ou Julio Prada.

Nel abórdase a represión fascista nas comarcas de Pontevedra, o sur de Lugo, Ferrol, A Coruña, a Mariña, Ordes e Terra de Montes, ademais de temas como os procedementos e actuacións dos represores, as mulleres falanxistas, o papel da Igrexa, os tribunais militares e a represión económica.

Trátase do primeiro traballo que estuda de forma global este fenómeno que completa o relato histórico desde outra perspectiva. Segundo un dos coordinadores, Xosé Ramón Ermida, “este libro ten vontade iniciática, pretendemos abrir un debate. Non é un libro que feche nada, o que queremos é favorecer o coñecemento sobre iso. A intención é darlle continuidade nas dúas perspectivas, a territorial e a temática, porque quedan outras moitas comarcas e tamén outros temas vinculados, como o papel da patronal na represión, por exemplo”.