Este documentario, gañador do Goya á mellor Curta Documentario en 2019, é unha viaxe a Gaza, en que através de diversos personaxes coñecemos a vulneración de dereitos humanos que sofren diariamente e a situación de bloqueo e após guerra pola que trata de sobrevivir a poboación palestina na Faixa de Gaza. Unha viaxe através das súas cidades, as súas xentes e tamén, dalgunha maneira, da súa historia baixo a ocupación de Israel.
O 1 de febreiro de 2019, a Parroquia de San Carlos Borromeo (situada en Entrevías) tiña programado proxectar este documentario e despois realizar unha presentación da campaña BDS (que promove o boicote, os desinvestimentos e as sancións ao Estado de Israel como fórmula para acabar coa ocupación dos territorios da Palestina), mais viuse obrigada a suspender a actividade por orde do Cardeal e Arcebispo de Madrid, Carlos Osorio.
Osorio instou á cancelación do evento debido ás ‘moitísimas presións da comunidade xudaica’. Como se á Igrexa lle tivese importado moito a comunidade xudaica no pasado (recomendamos o visionado do filme Amén, de Costa Gavras). ‘Non nos deron grandes motivos, ameazáronnos’, denunciou ante os medios de comunicación o párroco e membro da Coordinadora de Barrios, Javier Baeza.
Como cada vez que se dá un acto de censura (por exemplo, cando unha xuíza ordenou o secuestro do libro Fariña, de Nacho Carretero), convidamos todo o mundo a saltar o cordón de seguranza imposto por estas persoas sen nome -mais con moito poder- que se permiten decidir que é o que pode ser vistos e que non nun local do bairro de Vallecas e visualizar de forma masiva o documentario. Pode verse na íntegra a seguir:
Directores: Carles Bover e Xullo Pérez. O Retorno Producións. 2018. 18 mins.
Logo após a agresión israelita sobre a Faixa de Gaza no verán de 2014, unha vez tiveron cesado os bombardeos, a realidade do conflito desapareceu dos medios de comunicación.
Foi durante a mesma campaña de bombardeos sobre Gaza en 2014 cando a organización Rede Vermella organizou unha campaña de recollida de fondos para enviar axuda humanitaria ao pobo palestino. Os 8.000 euros arrecadados en solidariedade co pobo da Palestina foron entregados á internacionalmente recoñecida activista palestina, Leila Khaled (coñecida como a Che Guevara Palestina), nun acto público en Madrid en 2015. Agora, tres persoas (entre elas a ex-deputada Ángeles Maestro) foron citadas a declarar como investigadas ante a Audiencia Nacional por un posíbel delito de financiamento do terrorismo.
Neste caso, as activistas foron denunciadas por unha cidadá norteamericana membro de Lawfare Project, unha rede de ‘profesionais’ que defenden ‘os dereitos civís e humanos do pobo xudaico’, e pola Asociación Cultural Xudaica de Eivissa, que exerce a acusación popular xunto a Lawfare Project Spain.
