A liga Árabe pediu á comunidade internacional que presione Israel para que deixe en liberdade as presas e presos palestinos idosos ou con patoloxías de risco ante o perigo que supón o contaxio por coronavirus.
Nos cárceres israelitas hai máis de 5.000 presos palestinos, dos cales máis de 700 teñen idade avanzada. Tamén hai presos con patoloxías crónicas co sistema inmunitario débil e 180 nenos e 42 nais.
O subsecretario xeral da Liga Árabe, Said Abú Alí, afirmou en conferencia de prensa recollida pola axencia de noticias palestina Wafa que existe unha “necesidade humanitaria” e que o Dereito Humanitario ampara estas postas en liberdade. “Salvade a vida dos presos”, resaltou.
En calquera caso, Abú Alí istou as autoridades israelitas a proporcionarlles as medidas de protección necesarias para evitar contaxios e advertiu que as autoridades ocupantes son responsabeis da vida dos persoas presas.
Os prisioineiros palestinos anunciaron que porán en marcha unha serie de protestos para denunciar a pasividade do Servizo de Prisións de Israel ante o risco de contaxio por coronavirus.
Na pasada segunda-feira a Autoridade Palestina recibiu 25 millóns de dólares en impostos retidos por Israel para facilitar a loita contra o coronavirus, segundo explicou un porta-voz palestino, Ibrahim Milhem, que lembrou que son máis de 300 millóns os que retén Israel, o equivalente aos subsidios que a Autoridade Palestina paga a familias de presos e falecidos por acción israelita.