O xuíz instrutor da localidade siciliana de Ragusa, Giovanni Giampiccolo, invalidou a orde que mantiña inmobilizado en porto o barco de resgate da ONG Proactiva Open Arms, o que permitirá que o remolcador e os seus voluntarios poidan exercer novamente as tarefas de resgate de persoas migrantes e refuxiadas no Mar Mediterráneo. Varios dos seus tripulantes estaban acusados de favoreceren a inmigración irregular despois de participare no resgate de máis de 200 persoas.
A avogada da ONG Rosa Emanuela O Faro confirmou a decisión do xuíz que rexeitou así a orde de incautación confirmada o 27 de marzo pola fiscalía de Ragusa.
O barco da ONG fora inmobilizado de maneira cautelar no pasado 17 de marzo despois de atracar no porto de Pozzallo para desembarcar 216 inmigrantes e abriuse unha investigación á xefa de misión, Anabel Montes; o capitán, Mark Reig, e a un responsábel da organización.
Favorecer a inmigración irregular
Posteriormente, o xuíz instrutor de Catania confirmou a confiscación do barco da ONG Proactiva Open Arms e o cargo de favorecer a inmigración ilegal, mais desestimou o delito de organización criminal.
“Resta unha longa guerra xudicial”, advirte a ONG
Desta maneira, o caso pasou ao Tribunal de Ragusa, provincia a que pertence Pozzallo, que foi o que hoxe ordenou a liberación do barco. Entretanto, continuará a investigación penal, que pode durar polo menos un ano, como explicou no seu momento a EFE o tamén avogado da ONG Alessandro Gamberini.
Segundo o letrado, a decisión de hoxe tradúcese na “pouca seriedade da imputación” e afirmou que se trata “dun duro golpe” mais que o procurador poderá impugnar esta decisión. Aínda resta “unha longa guerra xudicial”, pois “gañamos apenas unha batalla”, engadiu.
A investigación refírese ao último resgate, durante o cal a ONG se negou a entregar as 218 persoas salvadas a unha patrulla da Garda Costeira libia que apareceu despois na zona. Ante a negativa, segundo algúns vídeos que difundiu a ONG, escóitanse as ameazas de morte dos libios.
O coordinador de Open Arms en Italia, Riccardo Gatti, afirmou que no barco recibiron unha chamada en que se lles advertía que Libia “tomaba a coordinación da operación”, e engadiu que “era a primeira vez que escoitamos os libios coordinaren un resgate”.
Os cooperantes esperaron 24 horas, e tiveron mesmo que pedir a Malta a evacuación dunha nai e un bebé en estado grave, até seren autorizados a atracar nun porto italiano.
Nos últimos días, a procuradoría de Catania chamara a prestar declaración os dous investigados, mais os avogados decidiron que non se presentasen xa que a investigación pasara a mans dos procuradores de Ragusa.
Fonte: Público
