O xuízo ás presas e presos políticos cataláns está xa aí. Os rumores de datas son ouitos, embora o único seguro é que será a partir da última semana de xaneiro. Sexa como for, dificilmente será alén do mes de febreiro. Por iso a procuradoría, a avogacía do estado e as defensas hai semanas que preparan un encontro que prevén se prolongará tres meses e incluirá decenas de testemuñas. Mais tamén se coordena a sociedade civil. Para evitar as vulneracións que houbo durante a fase de instrución, un conxunto de entidades vinculadas co mundo do dereito e a avogacía, crearon a International Trial Watch, unha plataforma que actuarà como observadora internacional.

As entidades impulsoras son Novact, a Associació Catalana per a la Defensa dels Drets Humans, o Institut dels Drets Humans de Catalunya, o Observatori del Sistema Penal i els Drets Humans da UB, o Col·lectiu Praga e Irídia. Din estaren preocupadas pola maneira en que foi executada a instrución, con vulneracións de dereitos substantivos, como a liberdade de expresión, ideolóxica e de reunión. Agora queren focalizarse na independencia e a imparcialidade do tribunal que xulgará a/os indepedentistas, e por iso queren observadoras presentes na sala. “sabemos que non mudará nada, mais é imprescindíbel que se sintan observados porque a presenza de especialistas no xuízo non lles permitirá faceren desconchavos xurídicos manifestos”, comenta Mercè Barceló, coordenadora do Col-lectiu Praga, que aquí actúa como porta-voz da plataforma coral.