A Policía sancionou con catro días de perda de remuneración e de suspensión de funcións o axente da Policía Nacional que a finais de 2017 esbofeteou unha muller nunha rúa do bairro de Orriols en València, segundo consta nunha resposta do Goberno ao senador Carles Mulet (Compromis), quen expresou a súa “perplexidade” pola sanción.

O axente foi gravado o pasado ano dando un bofetón a unha muller nunha rúa do bairro de Orriols de València após unha discusión. A pancada fíxo caer ao chan a muller mentres o compañeiro do policía ficaba quieto. O vídeo foi gravado no cruzamento da rúa San Juan de la Peña e Padre Viñas de València a pasada Noiteboa e subido despois en Youtube. As imaxes convertéronse en virais con 26.000 visualizacións nun día e numerosos comentarios.

Na resposta do Goberno sinálase que o comisario provincial de València acordou a incoación dun procedemento disciplinar o 29 de decembro pasado, que finalizou cunha resolución de 14 de febreiro, en que se acorda impor ao axente unha sanción de perda de catro días de remuneración e suspensión de funcións por igual período, prevista na lei do Réxime Disciplinar do Corpo Nacional de Policía.

O senador Mulet tamén se interesaba por se se considerou neste caso a agravante de tratarse de violencia machista. Contodo, o Goberno explica que esta normativa “non prevé a cualificación de violencia machista”, polo que se impuxo “a sanción máxima prevista para as faltas desta natureza”.

O senador apuntou nun comunicado que “sorprende xa de seu que, ante esta maneira a ollos vistos incorrecta de actuar do axente cara unha muller que aparentemente estaba intoxicada, non obteña unha sanción no procedemento disciplinar superior á de ‘leve’, que se dá en casos de impuntualidade ou descoido no aseo persoal, e se solvente con catro días de perda de remuneración e funcións”.

“É unha imaxe que non nos agrada ver de quen debe preservar a orde e servir aos cidadáns”
“É unha imaxe que non nos agrada ver de quen debe preservar a orde e servir os cidadáns, porque a resposta foi claramente desproporcionada ante unha persoa coas facultades mermadas”, subliñou Mulet, quen defendeu que os axentes de Policía “son os primeiros que deben ter clara a letalidade desta secuela da que son vítimas as mulleres” e que “as leis e autoridades deben adaptarse ás circunstancias e non deixar recunchos a esta clase de danos, menosprezo e agresións, especialmente entre os Corpos e Forzas de Seguranza do Estado”.

Portanto, lamentou a “impunidade” que se dá cando “a diferenza deste caso, non existen gravacións en vídeo nin denuncias de compañeiros polo corporativismo existente” e lembrou que Compromís avogou polos dereitos salariais, civís, de condicións de traballo e sindicais.

Mulet subliñou que “agora toca situarse e evitar que estes feitos xamais volvan acontecer ou que se salden con sancións que nos fan corar”, o que ve como “unha omisión clara de auxilio, deixando a xente desprotexida”.

A coalición proporá unha moción na comisión que corresponda para instar o Goberno a “corrixir esta situación” e incluír os casos de violencia contra as mulleres entre as tipoloxías de casos con sancións de maior gravidade.