Cunha convocatoria por redes, a Garda Civil aférrase a Facebook e Twitter para tentar demostrar que era toda unha organización a que estaba detrás e que hai un cerebro da trama. Mais a verdade é que as primeiras investigacións non revelan autoría coñecida. Hai 196 persoas imputadas que son parte das que cortaron a AP-7. Foron identificadas alí mesmo e a algunhas virom como o reboque lles levaba o coche.
O sumario do caso mostra que a policía non ten nada para poder abrir outra causa xeral contra o independentismo. Aquí nin sequera pode tentar a acusación de terrorismo.
A Garda Civil forza unha investigación baseada nos perfís dos manifestantes, obviamente independentistas, e nas súas publicacións na rede. Para manter vivo o caso seguen a pista das matrículas dos vehículos. Dous deles son o camión e a furgoneta coa que foi levado o escenario até o km 0. E a última grande revelación: un rúter e un cartón SIM Movistar que atoparon os Mossos.
Os vehículos do escenario
Antes das 9 horas da mañá do 11 de novembro, decenas de coches pararon no punto fronteirizo de La Jonquera, na AP-7, e comezou a montaxe dun escenario e de toda a equipa técnica para iluminar e sonorizar as actuacións que estaban previstas para as seguintes 72 horas.
O efecto sorpresa funcionou. Ao cabo dunhas horas, centenares de persoas enchían a autoestrada. 25 horas máis tarde comezou o desaloxo. Os guindastes, tanto dos Mossos d’Esquadra, como da Gendarmería, comezaron a retirar coches. Entre estes vehículos había os dous que levaran o escenario até La Jonquera.
A policía comeza a seguir a pista e chega até unha empresa de Alacant. O seu propietario é o mesmo que se presenta a buscar os vehículos. E aquí acaba a investigación. Porque a empresa non funciona desde o ano 2007 e a nave industrial está vacía
.
Para a Garda Civil, o condutor é o fío a seguir e o primeiro autor coñecido dunha organización anónima como é Tsunami Democràtic. E é acusado como “responsábel principal da montaxe do escenario”. Un feito que, en si mesmo, non é delituoso.
O router e o cartón SIM
Despois de evitar o despexo durante toda a tarde do día 11, na mañá seguinte policía abre camiño. Un despexo rápido e con moito gas que obrigaba toda a xente a recuar en dirección Catalunya, onde estaban mobilizados os Mossos d’Esquadra.
As persoas concentradas baixaron por un camiño que levaba ao Pertús ou ben por unha especie de marxe que tamén levaba a unha parte da vila.
Alí, onde está a antiga caseta fronteiriza, é onde os Mossos d’Esquadra acharon o router e o cartón SIM que atribúen aos organizadores da concentración. Mais no momento do despexo xustamente estaba chea de xornalistas que tomaban imaxes e as enviaban ás redaccións. Tamén é o lugar de refuxio de centenares de persoas, de todas as idades, que marchaban ordenadamente para evitar a policía.
Os Mossos entregaron o router e o cartón SIM á Garda Civil, que é quen leva a investigación e quen ten que analisar o seu contido. Mais de momento non ampliou estas investigacións, segundo fontes próximas ao caso.
Terroristas?
Grande parte do sumario son as fichas das persoas identificadas e detidas. Das 196, só unha declarou. O resto acolleuse ao seu dereito a non dicir nada.
A policía incide nos antecedentes das persoas identificadas, sobretodo de dúas delas, de quen destaca que foron detidas os anos 1978, 1986 e 1995 por “pertenza a banda armada ou terrorista”. Tampouco detalla nada máis. Nin concreta se foron procesadas, condenadas ou se o caso foi arquivado. Non desenvolve, tampouco, ao longo do sumario, nada máis sobre estas dúas persoas, alén de afirmar que tiñan o seu vehículo no medio do corte da AP7.
Esteladas e adhesivos
Para reforzar a teoría de que todo estaba perfectamente organizado, a Garda Civil rastrexa as redes e fai unha recompilación dos perfís das persoas identificadas. Todas independentistas. Algunhas con esteladas reivindicando a república e facendo un chamado a ir á Jonquera unha vez que a convocatoria foi feita pública xa se fixo pública.
Para reforzar o feito de que estas persoas poderían ser organizadoras do corte da estrada, fan un relatorio con fotografías dos vehículos con cartaces ou coa marca de adhesivos xa retirados.
Gemma Liñán
