A resolución considera legal a medida do Concello da distribución dos textos e sostén que non se achegou proba algunha de que o contido dos 32 libros doados atente contra os dereitos humanos.
A vice-presidenta do Consell, Mónica Oltra (d), e a concelleira de Feminismos e LGTBIQ+ do Concello de Castelló, Verónica Ruiz. Foto de arquivo. Doménech Castelló / EFE
O titular do Xulgado do Contencioso-Administrativo 1 de Castelló levantou a medida adoptada o 15 de outubro por unha maxistrada substituta do mesmo xulgado que suspendera a entrega de libros de temática LGTBI en 11 centros de ensino da cidade como medida cautelarísima despois da denuncia da Asociación de Avogados Cristiáns. O maxistrado sostén que non foi achegada proba algunha que confirme que o contido das 32 guías doadas atente contra os dereitos humanos.
Segundo o auto feito público hoxe polo Tribunal Superior de Xustiza da Comunitat Valenciana (TSJCV), a asociación cristiá considera que os libros de temática LBTBI “son ilegais”, sinalando que o seu contido “recorre ao constante escarnio das relixións”.
Ante estas afirmacións da parte demandante, o maxistrado afirma neste novo auto que “resulta obvio” que esta consideración non alicerza no “necesario substrato probatorio, sequera indiciario”. Así mesmo, explica, contrariamente ao que indican os avogados cristiáns, o uso que os centros fagan dos libros doados “non depende” do Concello, senón que entra dentro da lei autonómica que “prevé a existencia nas bibliotecas públicas de obras literarias da temática indicada, sendo xa unha cuestión allea ao acto administrativo impugnado e á competencia municipal, o modo en que poidan ser utilizados os materiais dentro do sistema educativo público”.
Doutra banda o consistorio afirmara que a súa actuación acha o seu fundamento legal “dentro das competencias municipais de promoción da cultura e equipamentos culturais” previstas legalmente.
Despois de analisar as alegacións presentadas polo Concello e o Ministerio Fiscal, o maxistrado entende que a actuación administrativa impugnada “ten un fundamento legal directo na Lei 8/2017, de 7 de abril, da Generaltat, integral do recoñecemento do dereito á identidade e á expresión de xénero na Comunitat Valenciana”. A lei do 2017 ten por obxecto garantir o dereito de autodeterminación de xénero das persoas que manifesten unha identidade de xénero sentida diferente á asignada no momento do nacemento.
Segundo recolle a resolución, que pode ser recorrida en apelación, “non se achegou proba algunha, sequera indiciaria, de que concorra a ilegalidade que a actora denuncia na actuación municipal”, así como tampouco “de que o contido dos materiais (libros doados) atente contra os dereitos humanos (…)”. “Non se probou, en definitiva, que a actuación impugnada puidese causar prexuízo algún (…). Acordar a medida cautelar neste caso equivalería a deixar a aplicación das leis vixentes ao arbitrio dos intereses ou valoracións subxectivas dos particulares”, concreta o auto.
