Mamadou Barry morreu despois de 20 días en coma após ter sido reducido polo persoal do centro. O Goberno da cidade critica o informe do órgao por ‘sementar unha dúbida moi preocupante’. Aínda se descoñecen as razóns da súa morte.
O corpo sen vida de Mamadou Barry foi enterrado en Melilla no pasado 20 de marzo. Tiña 17 anos, era de Guinea Conakry e residía no Centro Educativo de Menores Infractores de Melilla, coñecido como Centro de Reforma Baluarte. O 22 de decembro de 2017, o mozo morría no Hospital de Melilla despois de pasar 20 días en coma.
Chegou á UCI directamente do centro, onde se desvaneceu ao entrar en parada cardiorrespiratoria cando pelexaba con outro compañeiro e foi reducido polo persoal de seguranza, segundo explicou no seu momento o conselleiro de Benestar Social de Melilla, Daniel Ventura. O presidente da Asociación Pro Derechos de la Infancia (Prodein), José Palazón, denunciou que o mozo tivera que ser conducido ao hospital despois de ‘recibir unha malleira no centro’. As declaracións non sentaron ben ao Goberno local, que anunciou unha querela contra Palazón, aínda que a día de hoxe, aínda non lle foi notificada.
“Na contención realizada ao menor observouse certa rudeza”, di o informe
Agora, o Defensor do Pueblo emite un informe en que advirte ‘certa rudeza’ por parte do persoal do centro á hora de conter Mamadou. A observación forma parte do informe realizado despois de varias visitas multidisciplinares ao centro en que os técnicos do Defensor do Pueblo puideron examinar as instalacións, entrevistarse cos menores e co director.
No documento, o órgao indica que tivo ‘problemas para acceder ás gravacións dos incidentes’, aínda que posteriormente lle foron remitidas pola Consellería de Benestar Social, e lembra ao persoal que deben aplicar os medios de contención física e mecánica seguindo os principios de respecto á dignidade persoal, proporcionalidade, intervención mínima e temporalidade, tal e como establece o protocolo.
Un protocolo que, por outra banda, non foi traballado cos encarregados de o aplicar após o fatal desenlace, segundo aprecia o Defensor do Pueblo. No documento, o órgao tamén suxire que se especifique o número de persoas que deben aplicar o protocolo para inmobilizar os menores en situacións así.
Segundo comunicou a Fundación Diagrama, encargada da xestión do centro, foron catro empregados os que aplicaron a manobra de contención ao novo falecido que, acto seguido, caeu ao chan sen pulso e sen respiración. Foi atendido polos servizos médicos do centro e trasladado ao hospital, onde acabou falecendo 20 días despois.
Sen autopsia forense
Ventura explicou que Mamadou sufría doenza cardíaca conxénita, aínda que nunca mostrou documentos que o acrediten. De feito, a causa da parada cardiorrespiratoria continúa a ser un misterio. Segundo José Palazón, ao menor guineano realizóuselle unha autopsia clínica, que ‘só determina que a morte se produciu por unha parada cardiorespiratoria, que é como morre todo o mundo’. “Para determinar a orixe da parada tería que facerse unha autopsia forense, mais posibelmente non se faga nunca porque o rapaz foi enterrado rapidamente, sen o consentimento da nai nin a avogada”, lamenta o presidente de Prodein.
O informe do Defensor do Pueblo tamén detalla malas condicións nas instalacións do centro como humidades, baixas temperatura nas estancias e ausencia de auga quente nas duchas, a falta dun sistema centralizado de abertura mecánica de portas e interfonos nos cuartos. Sinala que non se realizan analíticas de sangue nin control de doenzas de transmisión sexual á chegada dos menores ao centro e pide que se preste atención psicolóxica individualizada aos internados que a requiran. Suxestións que aínda están á espera de resposta por parte da Consellería.
Ante as observacións do Defensor do Pueblo, Daniel Ventura criticou o informe porque ‘sementa unha dúbida moi preocupante’ entre a poboación e entre os propios menores acollidos por Benestar Social, declarou ao Faro de Melilla. Para o Conselleiro, ‘os traballadores que levaron a cabo a contención do rapaz fixérono seguindo o protocolo establecido e foi por unha mera cuestión de seguranza’, e insiste en que Mamadou morreu por unha parada cardiorrespiratoria. ‘Se as autoridades xudiciais tivesen que seguir investigando, nós estamos a favor de que fagan o seu traballo’, subliñou o conselleiro.
A respecto das outras apreciacións e suxestións do Defensor do Pueblo, Ventura afirmou que supoñen un ‘círculo vicioso e moi complicado’, xa que reciben grande cantidade delas e respondelas ‘provoca unha retardación importante dos procedementos administrativos que teñen que ver cos menores, como levar a cabo os rexistros, a escolarización, documentalos ou sacarlles o cartón sanitario’.
Jairo vargas
Fonte: Público