EsCULcA presentou o 27 de abril escrito á Oficina do Defensor del Pueblo en que demanda se abra expediente de queixa en relación á infidelidade na custodia e fuga de datos persoais de preso galego no C.P. de Mansilla de las Mulas (León), con infracción dos dereitos constitucionais recollidos nos artigos 18.1 e 4 (dereito á honra e á intimidade persoal). A Queixa está baseada na información aparecida o 22 de abril sobre a traxectoria e vida prisional do penado J.E.A.G.
Os datos de que se dá noticia na información aparecida no xornal non están relacionados con documentos públicos, como a sentenza ou súa situación penal, sinón que describen as circunstancias do preso no interior do cárcere, os obradoiros a que asiste, as actividades de lecer que realiza, o seu réxime de vida e as razóns que levaron a dirección do presidio a destinalo ao módulo en que cumpre condena.
A noticia recolle datos estritamente internos que só poden ser coñecidos pola Institución Penitenciaria, o que levanta sospeitas razoábeis de teren sido membros do propio cárcere os responsábeis desta fuga. Unha sospeita confirmada, aliás, polo propio xornal que sinala como fonte da información o cadro de persoal.
O escrito de Queixa foi remetido tamén ao Secretario Xeral de Institucións Penitenciarias para o seu coñecemento.