O sindicato Erne, maioritario na Ertzaintza, pediu sen éxito que fose retirada unha viñeta que forma parte dunha mostra ofrecida en Getxo sobre o setenta aniversario da Declaración Internacional de Dereitos Humanos. O PP levará o tema ao Parlamento Vasco, ao considerar que se trata dunha ofensa ás Forzas de Seguranza do Estado.
Elihu Duayer
Hai humor que encrespa. Ao sindicato ERNE da Ertzaintza e ao PP vasco acaba de pasarlles algo diso: tanto a central maioritaria no corpo autonómico como os conservadores puxeron o grito no ceo por unha viñeta que forma parte da mostra realizada pola oficina de Unesco en Euskadi sobre a Declaración Internacional dos Dereitos Humanos. Na imaxe en cuestión aparecen uns Anti-disturbios rindo ás gargalladas en tanto len un libro intitulado ‘Human rights’.
A Unesco ofreceu esta exposición -organizada polo Alto Comisionado das Nacións Unidas para os Dereitos Humanos- no polideportivo de Gobela, na localidade biscaíña de Getxo. Através de distintas imaxes, a mostra describe os diferentes artigos da Declaración dos Dereitos Humanos da ONU. A polémica chegou coa viñeta que acompaña o artigo número 5, que subliña que “ninguén será sometido a torturas nin a penas ou tratos crueis, inhumanos ou degradantes”.
Ese punto aparece acompañado por unha viñeta do artista brasileiro Elihu Duayer, en que hai tres policías morrendo a rir en tanto levantan cunha man as porras e coa outra suxeitan un libro sobre os Dereitos Humanos. Tanto ese debuxo como os 29 restantes que forman parte desta iniciativa foron seleccionados pola plataforma Cartoon Movement, que -segundo informou días atrás o xornal Eñ Correo- foron sobmetidos a votación popular.
Aínda que a mostra conclúe nesta cuarta-feira, o PP non deixará que o tema se esgote. Na sexta, día de pleno de control na Cámara vasca, a parlamentaria Nerea Chairos fará unha pregunta á conselleira de Seguranza do Goberno autonómico, Estefanía Beltrán de Heredia, a quen consultará por que non protestou pola inclusión desa viñeta, en que -no seu parecer- “se califica a Ertzaintza como torturadora e escarnece a defensa dos dereitos humanos”.
Críticas de ERNE
“Resúltanos incomprensíbel que non só non se alzase a voz pola exposición, senón que mesmo desde o Goberno Vasco parece que se apoiou a mesma”, critica Chairos. A seu xuízo, a mostra sinala as Forzas e Corpos de Seguranza do Estado “como torturadores”.
Previamente houbo duras críticas por parte do sindicato ERNE, maioritario na Ertzaintza, que chegou a solicitar a retirada do cartaz e unha rectificación por parte dos organizadores da mostra, xa que entendían que a imaxe os sinalaba como ‘torturadores’. Agora a polémica é levada ao Parlamento.
DANILO ALBIN @danialri