Os interrogatorios das testemuñas no xulgamento ao procés son tan interesantes polas respostas das persoas que comparecen ante o tribunal da sala segunda do Tribunal Supremo como polas preguntas que formulan os avogados. En cada unha delas están os argumentos da defensa.
Os avogados traballan para facer evidente que non houbo violencia nin nada que se pareza a un alzamento, necesario para o tipo delituoso da rebelión. E aos fornecedores que testemuñan, pregúntaselles se recibiron un encargo directo da Generalitat para faceren caer a acusación de malversación. Porque tamén é moi importante que non haxa nin facturas, nin pagamentos, nin o encargo directo da Generalitat da publicidade ou o material para celebrar o referendo do 1-O.
Mais hai outra pregunta que esta semana toma máis sentido que nunca: había orde xudicial para facer as inspeccións en Unipost? A Garda Civil irrompeu para confiscar as papeletas, as notificacións para os membros das mesas e os cartaces de publicidade. Había orde xudicial? Se non a había, a revista dos locais de Unipost foi ilegal.
Esta semana declaran 24 axentes da Garda Civil. Moitos deles son os que confiscaron todo o material entre o 20-S e o 1-O.
A pregunta xa a ouviron a semana pasada. Jordi Pina e Andreu Van dean Eynde preguntaron aos deseñadores, comerciais e responsabeis das imprentas e de Unipost se a policía, cando se presentou na súa sede, lles mostrara a orde xudicial.
Contodo, a preguntas da fiscalía o mesmo director de produción de Catalunya de Unipost, Jaume Planas, contou que o secretario xudicial non chegou até a tarde ao almacén de Terrassa, onde a inspección xa estaba en curso desde a mañá do mesmo 20 de setembro.
E o outro punto de interese: con que orde citou a Garda Civil as testemuñas no cuartel para as interrogar? Había supervisión do xuíz? Había citación?
Actuou pola súa conta a Garda Civil no que podería ser unha investigación do procés de alcance xeral, como quen lanza a rede a ver que pesca?
Esta semana as respostas serán contrastadas coas que darán os gardas civís que terán que explicar quen lles deu a orde de procederen a inspeccionar os locais. Se foi o xuíz e, portanto, tiñan orde xudicial, ou ben obedeceron ordes dos seus superiores.
Gemma Liñán