A Presidencia do Parlamento remitiu aos grupos unha proposta que, sob o título de ‘Normas de utilización das salas institucionais, espazos e outras dependencias do Parlamento’, regula por escrito o uso das súas dependencias e recolle, entre outras cuestións, que “se impedirá a presenza de persoas que usen pezas de vestir, accesorios, carteis, fotografías, pancartas ou calquera outro elemento que poida resultar alusivo a algún deputado, organización, institución ou terceiras persoas ou que, de calquera modo, menoscabe o decoro da Cámara.

Está previsto que o documento, sexa abordado nesta semana no Pazo do Hórreo e, como hai grupos molestos con puntos do contido, a Presidencia da Cámara afirma que os criterios recollidos non son “novos” en si mesmos e que non se trata máis que  dunha regulación “por escrito”, sen incorporar “novas restricións”.

A comisión ‘alternativa’ sobre sanidade impulsada en meses pasados pola oposición foi un foco de conflitos polo uso das dependencias da Cámara e a oposición censurou entón a actuación do xefe do Lexislativo, Miguel Santalices.

Máis recentemente, colectivos como o de ‘Enfermeiras en Loita’ denunciaron “censura” do Parlamento porque lles puxeron obstáculos para accederen á tribuna de convidados con camisolas reivindicativas. E é que o protocolo habitual na Cámara, como lembra habitualmente Santalices nos plenos, determina que non se poden levar este tipo de pezas.

Os deputados son a excepción e é común que leven camisolas reivindicativas, chapas ou outros elementos en defensa de causas que posteriormente defenden mediante iniciativas. Tamén adoitan pendurar cartaces e faixas na parte dianteira da mesa do seu escano.

ACTIVIDADE PARLAMENTAR

A proposta remitida aos grupos incorpora outros dous puntos. O primeiro deles relativo á actividade parlamentar e institucional, que fai constar que as salas da Cámara non asignadas aos grupos son espazos de uso “exclusivamente parlamentario e institucional”, polo que persoas e grupos “alleos” ao Parlamento fican “excluídos” do seu uso.

Ao tempo, recolle que “compete á Presidencia autorizar as actividades de carácter non institucional” que pretendan celebrarse fóra dos espazos dos grupos parlamentares, a condición de que non dispoñan nas súas instalacións do espazo ou recursos adecuados para a finalidade da reunión, e cando se trate de sesións en que polo menos algún dos asistentes teñan a condición de membro do Parlamento.

Engade o documento que este uso poderá ser aprobado pola Presidencia sempre que a sala non estea ocupada por actividade parlamentar. Ademais, nos espazos obxecto desta regulación prohíbese ” expresamente” a celebración de calquera actividade “impropia da formalidade dun poder público” ou que pretenda “suplantar, directa ou indirectamente, o papel e as funcións de calquera órgano” que contemple o regulamento da Cámara.

SOLICITUDE

Canto ao procedemento de solicitude, a formulación da dirección da Cámara autonómica é que o uso dos espazos da sede do Parlamento para a realización da actividade parlamentar ordinaria será tramitado polos servizos da Cámara. No resto de casos, “estará suxeito” á autorización da Presidencia.

A proposta é que as solicitudes, en todo caso, deberán ser presentadas cunha antecedencia mínima de 48 horas ao comezo da actividade para a que se pide o uso. Na solicitude indicarase a hora de inicio da reunión e a previsión da súa duración, así como o número estimado de asistentes e unha breve descrición da actividade.

O horario teríase que axustar ao aprobado para a abertura e encerramento da Cámara, salvo excepcións “xustificadas” e que deberían ser “apreciadas favorablemente” pola Presidencia. Finalmente, faise constar que o acceso ao edificio para a asistencia a reunións nas dependencias de uso non parlamentar deberá acreditarse debidamente ante os servizos de seguranza da sede através do Gabinete da Presidencia.

Galicia Confidencial