A intervención dos funcionarios, manifestamente excesiva, comeza cando o preso se dirixe á súa cela facendo unha sorte de danza inofensiva. Os funcionarios, equipados con coletes e porras, agardan a que este saia e comezan a mallar nel. As pancadas continúan mesmo cando o preso xa está no chan, completamente inmovilizado e reducido.
Os tres, investigados agora por Institucións Penitenciarias, dan varias puñadas e pontapés no preso. É tan grande a violencia que lles caen os walkie-talkies, que fican espallados no chan. Embora o preso pareza resistirse, nomeadamente no inicio da malleira, os funcionarios conseguen apacigualo a forza de paulada.
Nun dado momento, un dos tres agresores pisa as pernas do preso, que permanece deitado no chan. 55 pancadas despois, chegan outros catro funcionarios e cesa a agresión. Un minuto despois, o preso, xa apaciguado, é levado polo corredor polos tres funcionarios que inflixiron os malos tratos.
‘Tu abandono me puede matar’ , no entanto, afirmou nun comunicado que fora o interno quen batera “con pancadas, pontapés e puñadas” nos funcionarios, que están de baixa desde aquel momento. A asociación emitiu un comunicado en que defende os tres homes, “que viron a súa honra desprestixiada e que son inxustamente sinalados por estes feitos”.
Agresión á subdirectora antes da declaración
Alén da grave agresión a un preso con doenza mental nun contorno prisional sen atención psiquiátrica axeitada,o caso tomou tamén outra deriva perturbadora. A subdirectora de seguranza da cadea foi atacada nesta segunda feira na porta da casa por entre cinco e seis encapuzados, feitos que investiga a Garda Civil. “Mañá, caladiña”, dixéronlle na véspera da súa declaración no marco da investigación interna aos funcionarios, en tanto tres agresores a suxeitaban por atrás e outro lle daba dúas pancadas violentas na cara.
A funcionaria, que lonxe de asustarse acabou declarando no día seguinte da agresión, xa recibira mensaxes de cariz mafioso nun grupo de Whatsapp de ‘Tu abandono me puede matar’ . Tamén sufriu, no interior do presidio, o roubo do teléfono móbel en que recibira as mensaxes.
Na secuencia destes feitos, que causaron perplexidade no ámbito prisional, o colectivo de traballadores ‘Tu abandono me puede matar’ emitiu un comunicado mediante o nome dun escritorio de avogados de Alacant- que tamén representa o sindicato Jupol da Policía Nacional- en que anuncia accións legais contra os media que informaron da agresión á subdirectora de seguranza da prisión de Villena.
