Unha xuíza de Marbella retirou a custodia do fillo dun ano a unha muller porque vive “na Galiza profunda”, onde, segundo o seu criterio, non existen “múltiplas posibilidades para o adecuado desenvolvemento da personalidade dun neno e para que medre nun ambiente feliz”.
A titular do xulgado de primeira instancia número 7 outorga a custodia ao pai, que vive en Marbella, e só permite que os ambos proxenitores a compartillen se a nai se muda a esa localidade malagueña.
Segundo a xuíza, na “pequenísima poboación da Galiza profunda aonde se mudou a nai” non hai “opcións laborais” por estar “lonxe de todo”.
O escrito da xuíza -segundo La Voz de Galicia, que deu a coñecer hoxe o caso- define Marbella como unha cidade cosmopolita cun “bo hospital” e “todo tipo de escolas para poder educar unha crianza, públicas e privadas”. En contraste, segundo a xuíza, iso non ocorre na “pequenísima poboación da Galiza profunda aonde se mudou a nai” -na zona da ría de Muros e Noia- onde non hai “opcións laborais” e que está “lonxe de todo”.
A avogada da nai, Claudia Traba, presentou queixa ante a comisión disciplinar do Consello Xeral do Poder Xudiciario polo “absoluto desprezo” co que considera que actúa a xuíza e presentará un escrito para solicitar a nulidade do auto por non ser imparcial e porque na vista non foron tidas en conta as probas achegadas pola nai. Cre que puido haber vulneración dos dereitos constitucionais de tutela xudicial efectiva.
A muller mudouse fóra da Galiza hai catro anos por motivos laborais, e coñeceu o home co que tivo o fillo. No pasado verán, puxeron fin á relación e ela voltou á Galiza. Os dous solicitaron a custodia conxunta.