“Grazas á súa denuncia contundente e ao apoio social, algunhas das nais migrantes puideron reencontrarse coas súas crianzas despois de meses de sufrimento”. Así anunciaba esta sexta-feira Helena Manero, presidenta do Colectivo Caminando Fronteras, o feito de seis nais teren podido reunirse coas súas crianzas das que foran afastadas por orde da Fiscalía. Outras ainda están á espera.
.
Trátase dunha medida coordenada polo fiscal de sala, que ten como obxectivo evitar o tráfico de menores. Mais o proceso pode prolongarse até catro meses. As ONGs que traballan con persoas migrantes denuncian as consecuencias, traumáticas para as crianzas e as nais.
.
As nais gravaron un vídeo en que describen a dor que provoca esta medida: “Arranxen os problemas das mulleres migrantes. Levamos tres meses sen ver os nosos fillos e estamos sufrindo. Algunhas crianzas non comen e choran porque as nais non están. Unha destas xovens está doente”, pode ouvirse no vídeo, gravado en francés.
.
Peden que esta cuestión sexa considerada prioritaria en materia de inmigración e que se axilicen os trámites. A Consellaría de Dereitos Sociais do Goberno canario -a quen compete a tutela das crianzas- tamén mostrou o seu desacordo con estes protocolos.
.