O gasto militar mundial alcanzou un máximo histórico de case dous billóns de dólares. Malia a emerxencia sanitaria e social provocada pola covid-19, a despesa militar aumentou este ano un 2,6%, segundo o cálculo de Sipri (Instituto Internacional de Estudos para a Paz de Estocolmo), explicou o coordinador do Centro Delàs, Jordi Calvo. O estado español non só seguiu esta tendencia, senón que a superou con moito cun 9,41%.
Nunha rolda de prensa conxunta con Marea Blanca Catalunya e a Coordinadora española de ONGD, o xefe do Centro Catalán para o Estudo da Paz lamentou que, no medio dunha pandemia, os estados continuasen a ampliar os recursos económicos destinados á despesa militar, en lugar de atender ás necesidades sociais e de saúde. Só dous países optaron por reverter esta política: “Chile e Corea do Sur, que reasignaron parte dos seus fondos militares a despesas relacionadas coa pandemia. Mentres outros non consumiron a despesa militar prevista, como foi o caso de Rusia”, subliña Calvo.
O orzamento consolidado do Ministerio de Defensa medra en 664 millóns, un 6,5% respecto a 2020, e alcanza a cifra de 10.863 millóns. Non se corresponde cun orzamento que se describa como progresista, porque a maior parte dese aumento destinarase a promover os Programas Especiais de Armamentos.
No caso español, o Centro Delàs aprecia aumentos substanciais en dúas partidas específicas: un aumento do 44% na despesa en I+D militar, que en 2021 alcanza os 861 millóns e triplica o I+D sanitario de 2021 (287 millóns de euros), e un incremento na compra de armas, que en 2021 ascende a 2.341 millóns, pero que arrastrará ao longo desta década unhas partidas de entre 2.000 e 3.000 millóns ao ano, ata acadar aproximadamente os 13.000 millóns acordados para o pagamento de novos armamentos (submarinos, tanques), avións, etc., que non se pagan á vez, senón ano após ano).
“É importante ter en conta que a tendencia global cara á remilitarización extrema nas relacións internacionais é unha realidade que parece que non ten fin e, mentres continúe esta tendencia, debemos dar a voz de alarma. En vez de responder ás medidas sanitarias dunha pandemia, a resposta é cada vez máis seguritizadora”, destaca Calvo.
Pola súa banda, Andrés Amayuelas, da coordinadora de ONG españolas, indicou que, “cun día de gasto militar mundial, os Estados evitarían que 34 millóns de persoas acabasen condenadas á fame”. É dicir, 26 horas de despesa militar mundial permitirían o financiamento adicional de 4.500 millóns solicitados pola FAO. En relación á cooperación ao desenvolvemento, “estamos detrás de países como Hungría”, comenta Amayuelas.
“España destinará o mesmo diñeiro para mercar armas que para axudar ao desenvolvemento”, engadiu Calvo, que pediu ao Goberno que rectifique. “Os orzamentos son unha decisión política e a política faise a partir dos orzamentos”, lembrou.
A representante da Marea Branca de Catalunya, Esperanza Fernández, insistiu na necesidade de destinar orzamento a servizos públicos -educación, sanidade-, desmantelados na anterior crise.
Do mesmo xeito, advertiron da letra pequena dos fondos europeos para a recuperación da próxima xeración, por onde, en nome da modernización e da dixitalización, se pode acabar por coar despesa militar.
Fonte: El Salto Diario
