D. C., denuncia que sufriu unha agresión cometida por dous axentes da Policía Nacional nas inmediacións dun local de lecer nocturno da Coruña.
Os feitos tiveron lugar na madrugada da pasada sexta feira, despois de os membros da seguranza privada do local negaren a entrada ao agredido. Segundo explica el mesmo a Nós Diario, ía vestido cunha mini-saia que deixava á vista as medias, rachadas por ter sufrido unha queda antes de chegar ao lugar. Os gardas de seguranza dixéronlle que para poder entrar tiña que mudarse, ao que D.C. non se opuxo.
Cando voltou ao local, os gardas voltaron a negarlle a entrada, neste caso tamén á súa acompañante. Os dous xovens chamaron a Policía Nacional para que se presentase no lugar algún axente e intermediase.
Segundo a versión de C.C., chegaron catro axentes e, apesar de teren sido chamados polos xovens, “Comezaron a falar cos seguratas, sen facernos caso”.
Comeza a agresión
Finalmente, os policías pedíron á amiga do agredido que se identificase e pouco despois, ainda que ela xa se tiña identificado, foi detida por dous dos axentes, que a conduciron aos vehículos policiais estacionados nas proximidades do Palexco..
Foi aí cando D.C. pediu aos dous axentes restantes que o levasen coa súa amiga, xa que el é de Asturies e non tiña onde pasar a noite. Explica que acompañou os policías até o vehículo, e, no momento en que apoiou unha man no coche “porque estaba a sufrir un ataque de ansiedade”, os axentes comezaron a “bater nel coas porras, sen explicarlle por qué”.
“Despois diso, tiráron unha foto do meu Documento de Identidade (DI) e deixáronme alí deitado, sen asistencia”, lamenta D. C.. Entretanto, a amiga foi levada até as instalacións da Policía Nacional, acusada de non querer identificarse. Tanto ela como o agredido negan este extremo.
A vítima da suposta agresión acudiu ao Hospital, onde o atenderon dos golpes que recibiu. Principalmente nas pernas, en que presentaba diversos hematomas.
Denuncia por agresión policial
A súa saída do hospital, D.C. regresou ás dependencias da Policía Nacional para presentar unha denuncia por agresión policial.
“Espero que todo se solucione e evitar que isto volte a pasar, porque non é a primeira vez que ocorre na Coruña”, conclúe o agredido.
Nós Diario