Na pasada cuarta-feira, 16 de outubro, co gallo do mítin organizado polo partido Vox na Coruña e a resposta que preparaban colectivos antifascistas na cidade, tornaron a producirse identificacións e confiscos abusivos de propaganda. O colectivo Acción Antifascista convocara através das redes, para as 19:00 horas, un protesto contra a presenza do dirixente dese partido e avogado da acusación popular no xuízo ao procés, Javier Ortega Smith, nun acto político nunha sada do Palacio da Ópera.
Xa a primeira hora da tarde, dúas persoas foron abordadas por axentes da Policía Nacional cando se dirixían a unha ponte coa intención de pendurar unha faixa. As dúas foron identificadas e a faixa confiscada polos axentes, que non se privaron de realizar varias preguntas impertinentes- polo seu carácter persoal- durante a intervención.
Quince minutos antes da convocatoria, un grupo de persoas que se encontraba no parque de Santa Margarida foi retido polos axentes que custodiaban a zona. Estes procederon a identificar alguns mozos e inspeccionar as súas mochilas. O resultado foi unha nova faixa confiscada.
Xusto a seguir, unha das patrullas dirixiuse a parte superior do parque para continuar realizando identificacións de perfil claramente ideolóxico. O carro policial detívose ao lado de tres mozos que camiñaban pola zona e esixiu a súa identificación, sob a xusificación de se tratar dunha cuestión de prevención, amparada na Lei de seguranza cidadá (popularmente coñecida como Lei Mordaza).
O rexistro prolongouse vinte minutos. Nese tempo, os axentes solicitaron información sobre detencións previas, prohibiron o uso dos teléfonos móbeis e preguntaron aos mozos cal era o motivo da súa presenza no lugar. Antes de finalizaren esta retención, os axentes pediron aos tres o número de telefono (sic) sen explicar que razóns podía haber para solicitar esta información. Un deles acolleuse ao dereito a non facilitar máis datos alén dos que figuran no documento de identidade. Logo após unha nova pregunta para confirmaren que a resposta era negativa, os axentes recoñeceron que dereito estaba no seu dereito.
Posteriormente tivo lugar a concentración convocada polo colectivo Acción Antifascista a medio dunha forte presenza policial, cun cordón de axentes que rodeou os manifestantes durante todo o protesto.